حلَّت الفنانة ناهد السباعي، ضيفة على برنامج «كلمة أخيرة»، الذي تقدمه الإعلامية لميس الحديدي، عبر شاشة قناة «ON»، وكشفت العديد من الأسرار عن حياتها الشخصية والفنية، وكذلك تفاصيل أعمالها الاخيرة.

ناهد السباعي تتحدث عن وفاة والدتها

كما تحدثت ناهد السباعي عن والدتها الراحلة ناهد فريد شوقي، إذ قال: «كانت بنتي، ومعرفش أعمل أي حاجة من غيرها، وبعد رحيلها اكتشفت إني كنت بعتمد عليها في كل شيء، في شغلي ولبسي، مثلًا كان عندي مشكلة في مسلسل هبة رجل الغراب، وكنت مترددة، لكنها قالت لي انزلي اعمليه، نزلت وعملت المسلسل بناءً على نصيحتها، لأنها كانت دماغها حلوة ومثقفة».

وأضافت: «صحابي كانوا يقعدوا معاها عشان ياخدوا رأيها، لما حد بيقولي حاجة عن ماما على طول كانت بتقولها لي، كنت بحس إنها رسالة، وتعب ماما مجاش على طول، لما ماما توفت، ارتاحت، لأن إحنا كنا تعبانين ومتخبيين ومبنشوفش حد وما بنكلمش حد، حتى قرايبي عرفوا متأخر».

ناهد السباعي: والدتي ارتاحت

وتابعت ناهد السباعي: «وشيلنا شيلة لوحدنا، وأول ما توفت، هي ارتاحت لأن ده كان نفسها فيه، وكانت بتقول.. أنا عايزة أمشي، أنا كنت أنانية أوي في إني عايزها تفضل معايا، لأني حاسة إني بضيع من غيرها، حاسة إنها مبسوطة».